Garagardoaren Zientzia eta Teknologiako Masterra

PRESTA ZAITEZ GARAGARDOGINTZAREN SEKTOREA LIDERATZEKO

LEHEN EDIZIOAREN HASIERA: 2027KO IRAILA

Eman izena hemen - 2027ko irailaren 1era arte edo plaza guztiak bete arte.

GARAGARDOGINTZAREN SEKTOREAREN BILAKAERA BULTZATZEKO MASTERRA

Garagardoa edari bat baino askoz gehiago da: zientzia, teknologia, berrikuntza, jasangarritasuna eta negozioa da. Kontsumo-ohituren bilakaerak, ekoizpen-prozesuen digitalizazioak eta ingurumen-erronka berriek markatutako testuinguru honetan, garagardogintzaren sektoreak balio-kate osoa ulertu, optimizatu eta lideratzeko gai diren profesionalak eskatzen ditu.

Garagardoaren Zientzia eta Teknologiako Masterra Escuela Superior de Cerveza y Malta (ESCYM) erakundeak historikoki bultzatutako programaren bilakaera gisa sortu da. Erakunde hori 1965/1966 ikasturtetik erreferentea izan da Espainiako garagardo-maisu/maistren eta sektoreko profesionalen prestakuntza teknikoan. Garagardogintzako eta maltegigintzako espezialisten belaunaldiak sei hamarkadaz prestatu ondoren, ondare akademiko hori EDA Drinks & Wine Campus-en integratzen da orain, Basque Culinary Centerren edarietan espezializatutako campusean, Espainiako Garagardogileen Elkartearekin lankidetzan.

Trantsizio horri esker, ESCYM definitu duten zorroztasun teknikoa, pilatutako ezagutza eta industriarekin duen lotura estua gordetzen dira, eta, aldi berean, masterra metodologia, eduki eta teknologia berriekin eguneratzen da, garagardogintzaren sektorearen egungo eta etorkizuneko erronkei erantzuteko nazioarteko ikuspegiarekin.

ZERGATIK ERALDATUKO DU MASTER HONEK ZURE IBILBIDE PROFESIONALA?

• Sektoreko ibilbidea eta aintzatespena
  Espainiako Garagardogileen Elkartearekin lankidetzan garatutako masterra, garagardogintzako prestakuntza espezializatuan liderra den erakundearekin.
   
• Espainiako eta Latinoamerikako garagardogintzako teknologian nabarmentzen den masterra
  Gaztelaniazko prestakuntza bakarra, garagardogintzako talentua ikuspegi tekniko, sektorial eta nazioartekoarekin bultzatzeko diseinatua.
   
• Garagardoaren 360º-ko ikuspegia
  Zientzia, elaborazioa, kudeaketa, berrikuntza, gastronomia, jasangarritasuna eta joerak integratzen ditu, garagardogintzaren sektorea bere konplexutasun osoan ulertzeko.
   
• Prestakuntza tekniko integrala
  Sakontu garagardoaren elaborazioa hasieratik amaierara diseinatu, kontrolatu eta optimizatzeko funtsezko prozesu, teknologia eta eragiketetan.
   
• Aplikazio erreala eta proiekzio profesionala
  Presta zaitez garagardo-maisu/maistra izateko, proiektuak gidatzeko eta garagardogintzaren sektoreko funtzio teknikoak zein kudeaketakoak bere gain hartzeko.
   
• Lana eta ikasketak uztartzeko moduko formatu hibrido malgua
  Online aldia, ondoren inpaktu handiko aurrez aurreko esperientzia trinkoa eta aukerako enpresa-praktikak. 60 ECTSko prestakuntza osoa, zorrotza eta dedikazio handikoa.
   
• Industriarekin zuzeneko lotura
  Ikasi sektorearekin zuzeneko harremanean, jardunean dauden irakasleen, networking profesionalaren, garapen-aukeren eta garagardoaren balio-kateko ingurune giltzarrietako learning journeys esperientzien bidez: garagar- eta lupulu-soroak, maltegiak, garagardoa ekoizteko zentroak, hornitzaile espezializatuak, besteak beste.

INFORMAZIO PRAKTIKOA

• Izena emateko epea: 2027ko irailaren 1era arte edo plaza guztiak bete arte.
• Ikastaldia: 2027ko irailaren 6a - 2028ko ekainaren 23a
  • Online aldia: irailaren 6tik martxoaren 12ra (bost hilabete eta erdi)
  • Aurrez aurreko aldia: martxoaren 13tik ekainaren 23ra (hiru hilabete eta erdi)
• Hizkuntza: Gaztelania
• Iraupena: 60 ECTS
• Plaza kopurua: 18
• Modalitatea: Hibridoa
• Masterrak FUNDAEren bidezko hobaria jaso dezake, zati batean
• Irakaskuntza-lekua: EDA Drinks & Wine Campus, Vitoria-Gasteizko egoitza.
• Curriculumetik kanpoko praktikak: Aukerakoak, masterra amaitu ondoren
• Titulua: Basque Culinary Centerrek emandako Mondragon Unibertsitateko Formazio Iraunkorreko Magisteritza

IKASKUNTZA-HELBURUAK

Master honetan garatuko dituzun gaitasunak:

• Garagardoaren oinarri zientifiko eta teknologikoak ulertzea eta aplikatzea, ezagutza teoriko eta praktikoak integratuz.
• Ekoizpen-prozesuak ebaluatzea eta optimizatzea, garagardoaren elaborazioan eta azken produktuaren kalitatean eragina duten hobekuntza-aukerak identifikatuz.
• Elaborazioaren fase biokimiko eta mikrobiologikoak gainbegiratzea, ekoizpen-prozesu osoan muztioaren eta garagardoaren eraldaketa egokia bermatuz.
• Maltegiko eta garagardogintzako eraldaketak kudeatzea, funtsezko eragiketa horiek gainbegiratu eta optimizatzeko beharrezko ezagutzak aplikatuz.
• Kalitateko garagardo-proiektu berritzaileak diseinatzea eta garatzea, plangintzatik gauzatzera arte.
• Garagardogintzako industrian lidergo teknikorako funtzioak betetzea, garagardo-maisu/maistraren rola eta erakundeko beste departamentuekiko koordinazioa ulertuz.
• Garagardogintzaren sektorearen nazioarteko errealitatea eta bilakaera interpretatzea, haren joera, erronka eta aukera nagusiak ulertuz.
• Garagardoaren testuinguru historikoa, kulturala eta arauemailea ulertzea, baita horrek elaborazioan, merkaturatzean eta kontsumoan duen eragina ere.

IRTEERA PROFESIONALAK

Master honek, bereziki, garagardo-maisu/maistraren profilera bideratzeko prestatuko zaitu, sektorean eskatzen diren profil osatuenetako batera.

Garagardo-maisu/maistrak elaborazio-prozesu osoa gainbegiratu eta optimizatzen du, produktuaren kalitatea bermatzen du, taldeak gidatzen ditu, berrikuntza bultzatzen du eta ekoizpena, kalitatea, mantentzea, erosketak, logistika edo negozioaren garapena bezalako arloekin koordinatzen da. Horretarako, garagardoaren balio-katearen ikuspegi globala eta ezagutza tekniko eta estrategiko sakona behar ditu.

Garatu ahal izango dituzun beste profesional-arlo batzuk:

• Garagardoaren ekoizpena eta eragiketak
• Kalitatea, laborategia eta I+G
• Ingeniaritza, prozesuak eta etengabeko hobekuntza
• Kudeaketa, estrategia eta negozioa
• Craft sektorea eta ekintzailetza
• Merkaturatzea, banaketa eta merkatua
• Sektoreko hornitzaile-enpresak eta ekosistema
• Berrikuntza, dibulgazioa eta prestakuntza espezializatua

EZAGUTU EDA Drinks & Wine Campus

INSTALAZIOAK   EDA Drinks & Wine Campus Araban kokatutako bi egoitza independente eta osagarriren inguruan antolatzen da: bata Vitoria-Gasteizen, edarien unibertsoari eskainia, eta bestea Laguardian, Arabako Errioxan, ardoan eta lurraldearekiko duen loturan espezializatua. Bi kokalekutan banatutako campus bakar moduan pentsatuta, bi egoitzek prestakuntza, ikerketa, berrikuntza eta ingurunearekiko lotura uztartzen dituzte. Garagardoaren Zientzia eta Teknologiako Masterra Vitoria-Gasteizko egoitzan emango da. Egoitza honek 4.000 m² inguruko azalera du, eta hartzitutako edariak, garagardoa, sagardoa, destilatuak eta bestelako elaborazioak garatzera bideratuta dago. Honako hauek ditu: Planta pilotua Ekoizpen- eta berrikuntza-guneak Laborategiak Zentzumen-aretoak Drinks bar, prestakuntza praktikoko gune gisa. Prozesu errealekin esperimentatzeko, prototipoak garatzeko eta lan egiteko pentsatutako ingurunea.